Агит Кабајел: Подготвен сум да ја бранам титулата против секого

Новиот шампион во тешка категорија на ВБЦ, Агит Кабајел, изјави дека е подготвен да ја направи првата одбрана на појасот против кој било од најдобрите борци во категоријата. Германецот, кој ја презеде титулата откако Александар Усик ја напушти, треба да се врати на рингот во септември или октомври.

„Подготвен сум да се борам со секого. Еве го мојот број – само јавете ми се. Сакам конкуренција и го сакам најдобриот“, изјави Кабајел за Скај спорт.

Тој ги предизвика поранешните светски шампиони Тајсон Фјури и Ентони Џошуа, додавајќи дека би било логично двајцата прво да се соочат еден со друг, а потоа победникот да се бори со него.

Кабајел е отворен и за меч со победникот од борбата Филип Хрговиќ-Мозес Итаума, како и за обединувачка борба против идниот шампион на ВБО, која ќе се одлучи во реваншот меѓу Фабио Вордли и Даниел Дубоа.

„Не е важно кој е против мене. Само кажете ми го местото и датумот“, беше категоричен шампионот.