Во четвртокот, нашиот светски карате судија Дејан Милошевски го посети македонскиот конзулат во Чикаго за да додели благодарници на Петрит Муслиу, македонскиот конзул и вицеконзулот Срѓан Хаџи-Николов.
„Во 2021 година, по станувањето државен карате шампион на САД и отварањето на својот клуб, Милошевски маршал aртс, бев поканет на прием во конзулатот. На состанокот со конзулот и вицеконзулот разговаравме за моите успеси и планови, тогаш добив ветување за нивната континуирана поддршка во САД. Во 2023 година ми беше доделена титулата македонски карате амбасадор, што за мене е историски момент, бидејќи е прва титула од ваков тип во историјата на македонското карате, а ја добив токму во македонскиот конзулат во Чикаго. За ова признание сум бескрајно благодарен до конзулатот, до мојата фамилија, моите ученици и нивните родители, како и на моите пријатели за нивната непрекината поддршка на моето карате патување“, вели Дејан Милошевски.
Милошевски маршал артс постојано постигнува резултати и докажува дека Македонија има за што да биде горда и на американскиот континент. Во 2023 година Дејан беше избран меѓу топ 18 судии во САД и беше дел од тимот за избор на американската карате репрезентација. ММА, според бројот на медали, беше рангирана на 9-то место од 30 клубови на регионалниот шампионат. Оваа година, клубот беше претставен од еден од неговите ученици во Македонија, каде освои бронзен медал.
