Мек Грегор по повредата и поразот: Можам да го опишам ова само како пекол
Очекуваното враќање на Мек Грегор на борбите, по петгодишна пауза, заврши катастрофално. Големиот Ирец го заврши мечот за само 69 секунди.
Конор Мек Грегор мораше да му ја предаде борбата на Макс Холовеј на настанот УФЦ 329 во Лас Вегас, па неговиот спектакуларен камбек се претвори во вистински кошмар.
Ирскиот борец се обиде да изведе удар со нога, а во тој момент му попушти десното колено, а болната гримаса на лицето откри дека се случило нешто сериозно.
Судијата ја прекина борбата по само 69 секунди, па Макс Холовеј можеше да почне да слави. Но, Американецот не се чувствуваше како претерано да слави и веднаш му се приближи на противникот за да ја провери неговата состојба.
Мек Грегор, видливо скршен и во солзи, излезе од арената, оставајќи зад себе тишина и шокирана публика која очекуваше сè освен толку тажен крај.
Ирскиот борец се огласи на на социјалната мрежа X, а неговите зборови го потврдија она од што сите се плашеа – дека не е скршено само неговото тело, туку и неговиот дух.
Во емотивен пост, тој ги негираше гласините дека влегол во борбата со постоечка повреда.
„Главата ми се скрши. Бев скршен. Немав никаква повреда пред борбата. Цело време за време на подготовките, вклучително и во соблекувалната пред борбата, удирав, скокав и се движев нормално. Ова се случи од чист мир“, напиша Мек Грегор, јасно ставајќи до знаење дека повредата била сосема неочекувана.
Неговата порака заврши со зборови што ја замрзнуваат крвта и ја откриваат тешката ментална состојба во која се наоѓа:
„Јас сум надвор од депресија. Во многу мрачна состојба сум. Можам да ја опишам само како пекол“.
Веднаш по борбата, тој беше однесен во болница на детални прегледи, а првичната прогноза воопшто не е оптимистичка. Претседателот на УФЦ, Дана Вајт, набрзо излезе пред медиумите со првите информации.
„Претпоставуваме дека го скинал предниот вкрстен лигамент. Лекарите го мислат истото“, рече Вајт, потврдувајќи ја сериозноста на ситуацијата.
Ваквата повреда обично бара операција и неколку месеци закрепнување, што ја доведува во прашање не само следната борба на Мек Грегор, туку и продолжението на целата негова кариера.
Во меѓувреме, веста за шокантната повреда и емоционалната реакција на Мек Грегор брзо се прошири низ целиот свет, а неговиот противник Макс Холовеј покажа големо почитување, изразувајќи жалење за начинот на кој заврши борбата и велејќи дека е подготвен да возврати откако Ирецот ќе се опорави.
За Конор Мек Грегор, за жал, ова не е прв пат да се соочи со сериозни повреди и менталните предизвици што доаѓаат со нив.
Многумина сè уште се сеќаваат на 2021 година и тешката повреда на ногата во борбата против Дастин Пориер, повреда што го одвои од спортот долго време, потсетува Марка.
Неговото мачно закрепнување и последователната борба со депресијата беа детално документирани во документарната серија на Нетфликс од 2023 година „Мек Грегор засекогаш“.
Во серијата, тој самиот призна дека се плашел дека неговата кариера е завршена во тоа време и отворено зборуваше за менталната болка и стравовите што го прогонувале за време на неговата рехабилитација.
Се чинеше дека ги оставил тие демони зад себе, но судбината имала други планови и уште еднаш го ставила на најтешкиот можен тест.
