Илја Топурија по поразот од Гејџи: Оваа приказна е далеку од завршена
Илија Топурија ја објави првата официјална изјава по неговиот убедлив пораз од Џастин Гејџи во главната борба на УФЦ Фридом 250 во Белата куќа. Во својата порака, грузиско-шпанската ѕвезда покажа почит кон новиот шампион и одби да се извинува за првиот пораз во неговата професионална кариера.
Поранешниот шампион во лесна категорија беше принуден да се раздели од појасот откако неговиот персонал ја прекина борбата по четвртата рунда поради сериозните повреди што ги здоби за време на борбата. По борбата, Топурија беше однесен во болница на дополнителни медицински прегледи.
Во објава на Инстаграм му честиташе на Гејџи за неговиот настап и призна дека Американецот го исполнил своето ветување да остави трага по борбата.
„Џастин, честитки. Рече дека ќе оставиш трага на моето лице… и го направи тоа. Ми го затвори видот од десното око во првата рунда, а до крајот на втората, и на левото око“.
Топурија нагласи дека нема намера да го оправдува поразот со повреди или други околности.
„Без изговори. Имав еден од најдобрите тренинг кампови во мојот живот. Дојдов подготвен, фокусиран и спремен. Синоќа беше твоја ноќ. Таква е природата на овој спорт. Славата и болката одат рака под рака“.
На почетокот од борбата, шампионот изгледаше блиску до уште една импресивна победа и дури сериозно го потресе Гејџи во втората рунда. Сепак, Американецот успеа да ги преживее најтешките моменти, по што постепено ја презеде контролата врз борбата.
Од третата рунда па натаму, предизвикувачот почна да доминира, нанесувајќи му тешки удари и сериозни оштетувања околу очите на Топурија. Состојбата на шампионот беше толку алармантна што докторот во кафезот размислуваше неколку пати да ја прекине борбата.
И покрај проблемите со видот и видливите повреди, Топурија одби да се откаже и продолжи да се бори до крајот на четвртата рунда. Сепак, по последниот свиреж, неговиот персонал одлучи да ја прекине борбата за да избегне посериозни последици.
На крајот од својата емотивна порака, поранешниот шампион упати јасно предупредување до новиот крал во лесна категорија и јасно стави до знаење дека веќе размислува за втора борба.
„Ќе се излекувам. Ќе се одморам. И ќе се вратам посилен, помудар и многу поопасен. И верувајте ми… оваа приказна меѓу нас е далеку од завршена. Ќе имаме реванш“.
