„Џошуа првично седеше на совозачкото седиште, но потоа се замени. Тоа му го спаси животот“

Ентони Џошуа се врати во Велика Британија за да продолжи со закрепнувањето по тешката сообраќајна несреќа во Нигерија во која загинаа двајца членови на неговиот тим.

Личниот тренер на Џошуа, Латиф „Лац“ Ајоделе, и фитнес тренерот Сина Гами, трагично загинаа во понеделник кога луксузниот „лексус СУВ“ во кој се возеле се судри со камион паркиран на автопат во близина на Лагос. Џошуа претрпе полесни повреди во несреќата, беше однесен во болница и пуштен во среда.

Боксерот и неговата мајка веднаш посетија погребален дом за да се збогуваат со своите пријатели, чии тела таму се подготвуваа за нивното враќање во Велика Британија.

Погребите на Ајоделе и Гами се закажани за 4 јануари во Лондон, а Џошуа слета на аеродромот Лондон Стенстед во петокот вечерта, неколку часа пред церемонијата.

Возачот на возилото, Аденији Моболаџи Кајоде (46), беше обвинет во петокот за предизвикување смрт со опасно возење, невнимателно и небрежно возење, возење без должно внимание и грижа и управување со возило без важечка возачка дозвола, како што објавивме вчера. Му беше одобрена кауција од пет милиони наири (околу 3.000 евра) и беше ставен во притвор до исполнување на условите за кауција. Судењето е одложено до 20 јануари.

Адвокатот на Кајоде, Олалекан Абиодун, изјави за Дејли мејл дека неговиот клиент се изјаснил за невин.

„Мојот клиент тврди дека станува збор за несреќа. Сè уште немав можност детално да разговарам со него, но тој вели дека сопирачките не работеле. Исто така, сум информиран дека патувањето започнало во Лагос и дека Ентони првично седел на совозачкото седиште, но возачот го замолил да ги сменат местата. Колку што знам, Латиф бил напред во еден момент, а потоа ги сменил местата со Ентони“, рече Абиодун.

Од друга страна, Бабатунде Акинбији, портпарол на Агенцијата за регулирање и спроведување на сообраќајот на државата Огун, презентираше различни прелиминарни наоди.

„Според досегашната истрага, возилото во кое се возел Ентони Џошуа се движело со преголема брзина. Во текот на возењето пукнала предната гума од страната на совозачот, притоа возилото ја изгубило контролата, се оддалечило од патот и удрило во камион паркиран покрај патот. Брзината беше прекумерна“, изјави Акинбији.

Истрагата за несреќата продолжува, додека Џошуа, опкружен со своето семејство, се обидува да се опорави од физичкиот и емоционалниот шок од една од најтрагичните епизоди во неговиот живот.

Фото: Инстаграм