Александар Усик се сретна со Доналд Трамп

Поранешниот неприкосновен свеaтски шампион во бокс, Александар Усик, се сретна со 47-от претседател на Соединетите Американски Држави, Доналд Трамп, за време на неговата посета на Вашингтон. Фотографиите од средбата брзо го привлекоа вниманието на спортската заедница, бидејќи ова е уште еден значаен настан за време на престојот на украинската суперѕвезда во американската престолнина.

Само еден ден претходно, Усик на социјалните мрежи изјави дека за прв пат го посетил Пентагон и дека бил импресиониран од обемот на зградата. 39-годишниот Украинец продолжува да биде една од најголемите фигури во светскиот бокс. Откако доминираше во полутешката категорија и ги обедини сите главни светски титули, Усик го постигна истото и во тешката категорија.

Неговата кариера е полна со историски успеси. Олимпискиот шампион од Лондон во 2012 година го имаше професионалното деби во 2013 година, а само три години подоцна веќе беше светски шампион во полутешката категорија. Во 2018 година стана апсолутен шампион во дивизијата, а подоцна се искачи во тешката категорија, каде што го освои и врвот.

Во 2024 година Усик стана апсолутен светски шампион во тешка категорија, а во 2025 година го консолидираше својот статус со повторно обединување на сите главни појаси. До денес, Украинецот останува непоразен во професионалниот ринг со импресивен резултат од 25 победи, од кои 16 со нокаут.

Средбата со Доналд Трамп е уште еден доказ за глобалната популарност на Усик, кој одамна ги надмина границите на спортот и стана една од најпрепознатливите личности во светот на боксот. Додека фановите чекаат вести за неговата следна борба, шампионот продолжува да биде во центарот на вниманието и поради своите спортски успеси и поради неговото активно присуство на меѓународната сцена.