Том Аспинал сака реванш со Волков: Стана уште подобар

Шампионот на УФЦ во тешка категорија, Том Аспинал, изрази подготвеност за нов судир со рускиот ветеран Александар Волков. Во интервју за „One On One“, Британецот призна дека е импресиониран од развојот на противникот и очекува идна средба меѓу двајцата.

„Искрено, мислам дека Волков ја доби таа борба со Гане. Знаев колку е добар Александар кога се борев со него. Мислам дека стана уште подобар од тогаш. Верувам дека во одреден момент ќе имаме реванш“, рече Аспинал.

Аспинал го победи Волков со технички нокаут во првата рунда во март 2022 година, но Русинот покажа постојан напредок и, според многумина, беше подобар во борбата со Сирил Гане во декември 2024 година, иако загуби на поени со спорна одлука.

Откако Џон Џонс се пензионира од спортот, Аспинал се искачи на врвот во тешка категорија и веќе планира активна година, откако ја објави својата желба да учествува во четири борби во една календарска сезона. Реваншот со Волков изгледа како логичен чекор во таа амбициозна програма.