Поранешниот светски шампион во тешка категорија на ВБО Џозеф Паркер бара шанса повторно да се бори за дивизискиот трон, а тоа го потврди и на саботниот голем боксерски настан во АНБ aрената во Ријад, кога со технички нокаут во втората рунда го победи Мартин Баколе, кој влезе како доцна замена за Даниел Дубоа.
Баколе многумина го сметаат за еден од најопасните борци во светот, што беше очигледно кај Паркер, кој првата рунда ја водеше со голема почит против силниот противник кој беше потежок за околу 20 килограми. Новозеландецот го мавна со десната рака во втората рунда и неговиот противник беше на подот.
Конгоанскиот боксер, кој ја прифати борбата само два дена претходно, откако светскиот шампион во ИБФ Даниел Дубоа се повлече поради болест, успеа да стане, но сепак не беше стабилен на нозе, па судијата ја прекина борбата.
„Би сакал да му се заблагодарам на Мартин Баколе што го прифати предизвикот и на краток рок пристигна во Саудиска Арабија на овој меч. Тој ми даде добра борба“, рече Џозеф Паркер и продолжи:
„После се што се случи останав смирен и сконцентриран. Главната работа е што повторно победив. Во добра форма сум, силен, здрав и со бистра глава. Тренерот Енди Ли ми помогна многу, морав да бидам трпелив“.
Паркер ја има привремената титула на ВБО, што го прави задолжителен предизвикувач во потенцијалниот меч против светскиот шампион Александар Усик.
Украинецот беше покрај рингот во АНБ арената и гледаше како Паркер убедливо постигнува нова победа. Новозеландскиот боксер се надева дека ќе може да победи во борбата за светска титула против Усик.
„Претпоставувам дека сега треба да победам во мечот за светската титула. Ако Усик бара противник, јас сум подготвен. Сакам да се борам за титулата, сакам повторно да бидам светски шампион“, изјави Џозеф Паркер.
