Џермел Чарло: Ќе ми биде чест да се борам со Теренс Крафорд

Поранешниот апсолутен светски шампион во првата средна категорија, Џермел Чарло, изјави дека е подготвен да се соочи со непоразениот Американец Теренс Крафорд – еден од најдобрите боксери на планетата.

„Би ми било чест да излезам во рингот со него. Да го споделам рингот со Крафорд… тоа би било неверојатно. Ќе му ја дадам најдобрата борба“, рече Чарло на социјалните мрежи.

Последната борба на Чарло беше во септември 2023 година, кога загуби со едногласна одлука од мексиканската суперѕвезда Сол Алварез-Канело. Оттогаш, не се натпреварувал, но постојано алудираше на желба да се врати на големите борби.

Од друга страна, Теренс Крафорд се искачи во супер средна категорија и во септември 2025 година го победи истиот Канело Алварез со едногласна одлука, со што стана неоспорен шампион во друга дивизија.

Борбата меѓу Крафорд и Чарло би била судир на две ери и стилови – прецизниот и интелигентен боксер против експлозивниот нокаутер.