Тајсон Фјури повторно објави крај на кариерата: Никогаш нема да се вратам

Поранешниот светски шампион во бокс, во тешка категорија Британецот Тајсон Фјури, изјави дека никогаш нема да се врати во рингот. Фјури не боксувал откако загуби од Украинецот Александар Усик во реваншот во декември, минатата година.

Фјури неодамна побара трилогија борби против Усик, а неговиот можен дуел против сонародникот Ентони Џошуа постојано се споменуваше, но тој ја отфрли можноста за враќање на рингот, објави Скај. Тој присуствуваше на коњските трки во Донкастер и кога го прашаа дали ќе се врати на рингот, Фјури одговори: „Никогаш“. „Премногу сум стар, погледнете ја мојата брада, сива е. Боксот е младински спорт“, додаде 36-годишниот Фјури. Тој гледаше трка во која учествуваше неговиот коњ „Големиот ромски крал“ и беше прашан дали ќе учествува на трките. „Можеби, којзнае“, изјави Фјури.

Фјури го објави своето пензионирање на почетокот на 2025 година, кратко по неговиот втор пораз од Усик, што дефинитивно го зацврсти Украинецот како неприкосновен шампион. Сепак, само неколку месеци подоцна, Британецот повторно почна да зборува за можен реванш, па дури и ја изјави намерата да се врати следната година.