Поранешниот шампион на ВБЦ, Тајсон Фјури, го шокираше светот на боксот во јануари кога објави дека се пензионира, само неколку недели откако по вторпат загуби од непоразениот Украинец Александар Усик.
Фјури го доживеа првиот пораз против Усик минатиот мај кога загуби со поделена одлука во мечот за неприкосновениот шампион во тешка категорија.
И по поразот од реваншот на крајот на годината, 36-годишниот Британец реши да се повлече и покрај гласните шепоти во боксерските кругови за потенцијална борба против Ентони Џошуа.
Но, Фјури засега цврсто стои на својата одлука, а неодамна му испрати порака на поранешниот ривал Дионтеј Вајлдер да го следи неговиот пример бидејќи во последно време е во лоша форма.
Бронзениот бомбардер има четири порази во последните пет меча, а неговата следна борба е закажана за 27 јуни на настан во Вичита против Тајрел Херндон.
Џипси Кинг верува дека нивната брутална трилогија зеде сè од Бронзениот бомбардер. Откако првиот меч заврши нерешено, Фјури двапати го совлада Вајлдер.
„Искрено, би сакал да го видам кутриот стар Дионтеј како се повлекува од боксот. Со нашата трилогија си одзедовме многу години од животот. Таа војна што ја имавме, која заврши со нокаут во 11. рунда, исцрпи многу енергија. Тешко е да се опоравиш од такви борби. Имаше десет нокдауни во нашата трилогија“, рече Тајсон Фјури за поткастот Паунд 4 паунд со Камару и Хенри и продолжи:
„На секој борец му треба долго време да се врати по вакви порази. Бараше само големи мечеви, па загуби од Џозеф Паркер и Жилеј Жанг. Вајлдер сега е само сенка на неговата поранешна слава. Единственото нешто што не е променето кај Дионтеј е неговото име. Би сакал да го видам како се пензионира пред да си наштети. Тој веќе не е истиот борец“.
