Непоразениот американски боксер Џервонта Дејвис минатата година извесно време помина во затвор, бидејќи го прекрши правилото за домашен притвор.
Имено, тој се соочи со многу посериозна казна откако во 2020 година со своето ламборџини помина на црвено светло на семафор и сокри сообраќајна несреќа во која беа повредени четири лица.
Тенк ја призна вината и беше осуден на седум години и 55 дена. Но, судот беше многу благ и му одреди 90 дена домашен притвор и 200 часа општествено корисна работа.
Познатиот боксер ги прекрши правилата еден месец по изрекувањето на пресудата, па остатокот од казната мораше да го одлежи во затвор. Моментално е на условен отпуст, што му го ограничува патувањето во странство.
Една година по тие настани Дејвис поднесе барање да му биде дозволено да патува во Париз за да ги поддржи американските боксери на Олимпијадата.
Неговиот случај се врати кај судијката Алтеа М Хенди, која Дејвис минатата година ја нарече „луда“. Во овој случај, директорот на американската репрезентација Мет Џонсон застана во одбрана на Тенк, кој во писмо напиша:
„Со оглед на неговиот статус меѓу најдобрите светски боксери, господин Џервонта Дејвис би бил клучна личност за мотивирање и поддршка на нашиот тим да постигне најдобри можни резултати и да биде најдобрата спортска нација на овогодишните Олимписки игри“.
Многумина се сомневаа дека судијката Хенди ќе го исполни барањето, но таа одлучи дека Дејвис може да ги напушти САД. Така, Тенк ќе се појави во Франција за да ги поддржи американските боксери на Игрите кои почнуваат на 26 јули и ќе траат до 11 август.
