Жорж Сент Пјер (41) ја заврши својата успешна ММА кариера во ноември 2017 година кога го победи шампионот Мајкл Биспинг во дебито во средна категорија и го освои појасот на УФЦ.
За канадската легенда на боречките вештини тоа беше 13-та победа во низа и 26-та во кариерата (со два порази), со која ја освои и втората шампионска титула на најголемата светска ММА организација.
Долгогодишниот владетел на УФЦ во полусредна категорија во едно неодамнешно интервју откри дека донекаде жали што не се борел со Андерсон Силва и Хабиб Нурмагомедов во текот на неговата кариера.
„Сакав луѓето да ме паметат како најдобриот борец во историјата. Отсекогаш сум сакал да бидам најдобар“, изјави Жорж Сент Пјер и откри како сакал да се бори против двајца подеднакво големи борци:
„Првата е против Андерсон Силва, а втората против Хабиб. Но, имаше причини зошто тие натпревари никогаш не се случија“.
Поранешниот двократен шампион се обиде да го објасни тоа…
„Кога си борец, ти треба противник и организатор за да договори меч. Дури и кога и двајцата сакаат борба, а промоцијата не сака, тој меч-борба нема да се случи“, рече Жорж Сент Пјер и заклучи:
„Секој борец ги изнесува своите услови, потоа се преговара и промоторот ја организира борбата. Тоа никогаш не се случи со Силва и Хабиб“.
