Теквондо клубот Корио го освои првото место во генералниот пласман на Меѓународниот турнир „Корио опен 2024“ што се одржа изминатиов викенд во Скопје со 142 поени. Втор е Бутел со 128 поени, трет е Младост со 74.
Понатаму следат Хваранг фист 58, Сокол 40, Те Макс 39, Еродаики Динами 39, С 3 38, Кобра 37, Феникс 35, МТФ Тим 30, Улцињ 29, Монтенегро старс 12, Помсае 11, Феникс булевар Ниш 9, Гоце Делчев 7, Тигри 5.
Првопласираниот тим Корио освои 54 медали – 16 златни, 17 сребрени и 21 бронзен.
На турнирот настапија 300 натпреварувачи од Црна Гора, Бугарија, Босна и Херцеговина, Србија, Грција и сите домашни теквондо клубови обединети под чадорот на Македонската таеквондо федерација.
Турнирот беше во организација на ТК Корио и МТФ во Општина Кисела Вода.
Турнирот го отворија претседателот на МТФ д-р Борче Костовски и градоначалникот на Општина Кисела Вода Орце Георгиевски.
„Македонското олимписко теквондо продолжува да поставува високи стандарди за организираност, врвни спортски резултати и енергија која гарантира блескава иднина“, велат од Корио.
