Ентони Џошуа му испрати порака на Тајсон Фјури: Ако сака, нека дојде на мојот ринг

Поранешниот светски шампион во тешка категорија, Ентони Џошуа, изјави дека со нетрпение очекува да се соочи со идниот ривал Тајсон Фјури, но овој пат под негови услови.

На 25 јули Џошуа ќе се соочи со Кристијан Пренга во Џеда во борба која се смета за загревање за неговата долгоочекувана средба со Фјури закажана за подоцна оваа година.

Во април Фјури го покани Џошуа на рингот по неговата победа над Арсланбек Махмудов за официјално да ја објават нивната претстојна борба. Во тоа време Џошуа претпочиташе да остане во публиката, но сега е подготвен за таква средба – овој пат по сопствената борба.

„Ако сака да дојде во рингот кога ќе победам на 25 јули, нека дојде. Нека дојде на моја територија. Јас сум домаќинот. Подготвен сум да го пречекам. Тој не ме пречека во својот ринг“, рече Џошуа во интервју за ДАЗН.

Британецот објасни и зошто не стапнал во рингот од победата на Фјури во април.

„Не играм игри – тоа не е мој стил. Да беше договорот веќе потпишан, ќе излезев. Бев таму во извидувачка мисија за да го набљудувам мојот иден противник. Видов многу – и неговите силни и слаби страни“, додаде тој.

Пред очекуваниот судир меѓу нив, двајцата ќе имаат последни подготвителни средби. Џошуа ќе боксира против Кристијан Пренга на 25 јули во Џеда, а еден ден претходно Тајсон Фјури ќе се соочи со ветеранот Мариуш Вах во Патаја.