Тренерот на Махачев ја посочи „слабата алка“ во борбата на Илија Топурија

Главниот тренер на Ислам Махачев, легендарниот Хавиер Мендез, веќе започна детална анализа на шампионот во лесна категорија Илија Топурија во подготовка за можна мега борба меѓу двајцата.

Во поткастот „Know Time“, тренерот на Американската академија за кикбокс, кој ги донесе имињата како Хабиб Нурмагомедов, Даниел Кормиер, Каин Веласкез и Лук Рокхолд на врвот на УФЦ, дискутираше за тоа како би подготвил борец против непоразениот Грузиец.

„Мора да се држите подалеку од боксерската дистанца со него – милион проценти“, објасни Мендез. „Тој го има најдобриот бокс во целиот ММА. Толку е уверен што дури верува дека може да го победи Теренс Крофорд“.

Тренерот додаде дека Топурија не се потпира само на своите раце:

„Има добро борење, и, според луѓето кои тренирале со него, знае и пристојно џиу-џицу“.

Сепак, Мендез верува дека шампионот не е совршен.

„Тој е речиси универзален борец, но не баш. Му недостасува силен арсенал на удари со нога – тоа е неговата најслаба алка. Тука треба да се тестира. А потоа – во борење, да се види дали е толку добар како што изгледа. Досега не видовме колку е навистина ефикасен во тие елементи“.

Борбата меѓу Илија Топурија и Ислам Махачев веќе се оформува како една од најочекуваните борби во целиот свет на ММА. Но, тоа можеби нема да се случи ако следниот месец Махачев не успее да ја освои титулата во велтер категорија против Џек Дела Мадалена на УФЦ 322.

Самиот Топурија веќе го предупреди Махачев дека нивниот меч зависи од исходот на оваа борба:

„Ако Ислам изгуби, може да се врати во Дагестан, на својата фарма и да продолжи да чува овци“, рече шпанско-грузискиот борец на прес-конференција во Грузија. „Но, ако победи – дефинитивно ќе се соочам со него. Сто проценти“.