Вчера, екипата што го освои првиот сениорски медал за Македонија во 2005 година на Европското првенство во Тенерифе, Шпанија, го одбележа овој успех што ќе остане запишан со златни букви во нашата спортска историја.
По повод 10 години од освојувањето на бронзениот медал (единствен до сега) во кати екипно во сениорска конкуренција на 40-тото Европско првенство во Тенерифе, Тамара Рибарска, Симона Трајкоска и Ивана Димитрова повторно застанаа на татамито, под водство на нивниот тренер и селектор, шихан Живко Тасевски, носител на мајсторски појас 8 дан.
„Општиот впечаток по тренингот беше дека екипата функционира како никогаш да не престанала да вежба. И не само тоа, во екипата се уште владее карактеристичниот позитивен дух.
Се надеаме дека во иднина нашиот успех ќе се повтори. Секако, не смее да се заборави дека ова е екипата која го донесе првиот медал од официјално европско сениорско првенство“!, изјави Тасевски видно задоволен од тренингот, нагласувајќи дека му е драго што направил една екипа која и по петнаесет години функционира и во сала и надвор од неа.
ipon.mk/В.Д.
