Конор Мек Грегор последен пат беше во октагонот пред повеќе од една година кога ја скрши ногата на мечот против Дастин Пориер.
Озлогласениот ја санираше повредата и се врати на тренинзите, но за многумина се уште е далеку од враќање во октагонот.
Големата ѕвезда на УФЦ со месеци најавуваше враќање, но тешко дека тоа ќе се случи до крајот на годината.
Доколку реши да се врати на борбите, ќе биде интересно да се види во која категорија, бидејќи во многу негови објави можеше да се забележи дека ставил дополнителна мускулна маса за време на опоравувањето.
Многумина веруваат дека тоа би било во полусредна категорија, бидејќи ако го освои појасот во дивизијата што моментално го држи Камару Усман, тој ќе стане првиот борец во историјата што ја освоил титулата на УФЦ во три различни дивизии.
И Усман, како и другите борци, не би имал ништо против борба со Мек Грегор, но истакнува дека шампионските денови на Конор завршија.
„Можеби ќе се врати на борбите, но неговите денови на освојување титули завршија. Кога се борам со некого го учам противникот одвнатре. Ја следам неговата храброст и според мене Конор е готов“, рече Камару Усман и додаде:
„Целта му беше да заработи. Тоа беше неговата главна мотивација, а сега кога веќе не е сиромашен, тоа се промени. Може да ме прозива по име, но тоа не значи дека ќе се бори со мене. Може да ги одбира борбите, бидејќи е голем за УФЦ. Да се бори утре, сепак ќе продаде милион ППВ“.
Камару Усман ќе ја брани титулата на УФЦ во полусредна категорија против Леон Едвардс на 20 август.
