Усик пред спектаклот во Египет: Правев сè што требаше. Заслужувам да го направам она што јас го сакам!

Александар Усик е еден од најкомплетните боксери на денешницата и еден од ретките кои успеаја да освојат светски титули во две тежински категории. Украинецот ги победи елитните противници во текот на целата кариера и го потврди статусот на еден од најдобрите борци на својата генерација. Покрај горенаведеното, освои и олимписко злато во 2012 година во Лондон.

Во меѓувреме, Украинецот се подготвува за следниот предизвик – борба против Рико Верховен, која е закажана за 23 мај во Египет. По тој повод се одржа интересна прес-конференција, која можевме да ја следиме преку официјалниот Јутјуб на платформата ДАЗН бокс.

Тоа е „кросовер“ меч кој предизвика голем интерес, а Усик објасни зошто прифатил таков предизвик:

„Еднаш сакам да правам она што јас сакам да го правам. Не што морам. Сега правам што треба да правам“!

Исто така, Усик без двоумење даде прогноза за потенцијален спектакл меѓу Тајсон Фјури и Ентони Џошуа.

Украинскиот шампион, кој веќе има победи против двајцата, верува дека Џошуа би победил во нивниот меѓусебен судир.

„Ако Тајсон Фјури потпише борба со „Еј-Џеј“, јас ќе се повлечам… „Еј-Џеј“ ќе победи. Тој е идниот апсолутен шампион“, рече Усик.

Фјури неодамна ја оживеа приказната за тој меч по победата над Арсланбек Махмудов, кога директно го прозва Џошуа, кој седеше покрај рингот. Сепак, одговорот на британскиот боксер беше воздржан, што создаде непријатна ситуација и дополнително ги искомплицира преговорите.

Усик, кој има победи над двата ривали, очигледно повеќе му верува на Џошуа во потенцијална пресметка меѓу двајцата британски тешкаши.