Трамп најави шампионски меч на УФЦ во Белата куќа во 2026 година
Претседателот Доналд Трамп објави на настан на Државниот саем во Ајова дека Белата куќа ќе биде домаќин на турнир на УФЦ во 2026 година со шампионски меч по повод 250-годишнината од Соединетите Американски Држави.
„Секој од нашите национални паркови, бојни полиња и историски места ќе има специјални настани за да ја прослави 250-годишнината од Америка, а мислам дека дури ќе имаме и УФЦ борба“, им рече Трамп на присутните.
Настанот ќе се одржи на територијата на Белата куќа, кој може да собере до 25.000 гледачи.
„Ќе имаме УФЦ борба, размислете, на територијата на Белата куќа. Имаме многу земјиште таму. Ќе градиме малку, не ние, туку Дана Вајт ќе го направи тоа. Дана е одличен. Единствен во родот“, продолжи Трамп.
„Ќе имаме УФЦ борба, меч за титулата, целосна борба, околу 20.000 до 25.000 луѓе. И ќе го направиме тоа како дел од 250-те години. Ќе имаме некои неверојатни настани, некои професионални настани, некои аматерски настани. Но, УФЦ борбата ќе биде голема работа“.
Врската на Трамп со боречката промоција и извршниот директор на УФЦ, Дана Вајт, датира од пред неколку децении. УФЦ 30: Бател он д Боардвок се одржа во казиното на Трамп „Таџ Махал“ во Атлантик Сити во февруари 2001 година. Местото беше домаќин и на УФЦ 31: Локед енд лоудед три месеци подоцна. Трамп присуствуваше на неколку настани на УФЦ, вклучувајќи ги УФЦ 302, УФЦ 309 и УФЦ 314 во Мајами во април.
Вајт зборуваше на митинзите на Трамп пред изборите минатиот ноември и го претстави Трамп на сцената на последната вечер од Националната конвенција на Републиканците во 2024 година.
Сè уште не е познато дали планираниот настан ќе се одржи во затворен простор или на отворено, или дали ќе биде настан „Фајт најт“ или ќе се емитува со платено гледање.
