Трамп го спореди објектот на УФЦ пред Белата куќа со Ајфеловата кула: Можеби тука и ќе остане тука

Во нова контроверзна изјава, американскиот претседател Доналд Трамп повлече неверојатна паралела меѓу привремениот објект на УФЦ што се гради на тревникот на Белата куќа и парискиот симбол, Ајфеловата кула.

Првиот човек на Соединетите Американски Држави посочи дека боречката сцена на најголемата ММА светска организација може да остане трајна инсталација и предизвика лавина од реакции низ целата земја.

„Многу луѓе не знаат дека Ајфеловата кула, изградена во Париз во 1889 година, требало да се сруши по Светскиот саем. Потоа дојдоа и рекоа: „Ни се допаѓа ова“. Па ја оставија малку подолго и еве ја, сè уште стои таму“, рече Доналд Трамп и додаде:

„Сега градиме нешто пред Белата куќа што е привлечно за луѓето, таму ќе има голема УФЦ борба на 14 јуни. Сега кога ја гледам, можеби никогаш нема да ја отстраниме“.

Оваа споредба предизвика шок и неверица, а идејата за трајна боречка арена пред резиденцијата на американскиот претседател предизвика жестока дебата за соодветноста на таков потег.

Настанот, наречен „УФЦ Фридом 250“, е закажан за 14 јуни 2026 година и е наменет да ја одбележи 250-годишнината од независноста на Соединетите Американски Држави и да го прослави 80-тиот роденден на Трамп.

Изградбата на рингот и придружната инфраструктура на јужниот тревник на Белата куќа веќе предизвика критики, но споредбата на претседателот со еден од најпрепознатливите споменици во светот дополнително ги зголеми тензиите.

Критичарите веруваат дека ова ја тривијализира важната национална годишнина и го претвора просторот од историско значење во позадина за лична промоција и забава.

Реакциите на изјавите на Трамп дојдоа од сите страни на политичкиот и општествениот спектар. Демократските пратеници остро го осудија целиот проект, обвинувајќи го претседателот дека целосно „го губи контактот со вистинските проблеми на Американците“.

Владините надзорни тела изразија длабока загриженост за замаглувањето на линиите меѓу официјалните владини функции и личните, дури и финансиските интереси, посочувајќи ги деловните врски на Трамп со ТКО груп холдинс, матичната компанија на УФЦ.

Интересно е што критиките не изостанаа од самите боречки кругови. Познатиот коментатор на УФЦ и поддржувач на Трамп, Џо Роган, ја нарече идејата за борба на отворено пред Белата куќа „чудна“ и кратко рече: „Не ми се допаѓа“.

Целиот настан, патем, е приватно финансиран. Се проценува дека УФЦ и нејзината матична компанија ТКО ќе ги покријат трошоците од околу 60 милиони долари, што вклучува и целосна реставрација на тревникот по спектакуларниот настан.