Столе Смилковски имаше одлично издание на Балканското првенство за деца освојувајќи го златниот медал во борби во категоријата до 57 килограми за деца од 14 години
Смилковски првенството го почна силно, нанесувајќи му тежок пораз на репрезентативецот на Босна и Херцеговина, Дино Сараџан, од 9-0. Потоа го совлада Словенецот Јуринец Матевц со 4-0, а третото коло славеше со 1-0 над турскиот претставник Мухамет Јавуз. Во македонското полуфинале беше подобар од Лирим Емини 2-0. Македонско-црногорското финале заврши со 1-0 за Смилковски над Бојан Бошковиќ.
„Најтешко ми беше во борбите со Јавуз од Турција и во финалето со Црногорецот Бошковиќ. Но, се концнетрирав и ги победив“, вели Смилковски.
Инаку, Смилковски е член на КК Олимпик спорт од Скопје под раководство на тренерите Александар Кузмановски и Кристијан Младеновски. Карате почнал да тренира во 2007 година.
Од идната година ќе затропа на вратите на кадетската репрезентација, така што на дофат ќе му бидат и европските првенства.
„Сега се подготвувам за Светскиот куп во Умаг, Хрватска, кој се одржува од 29 јуни до 5 јули. Се надевам на успех и во Хрватска“, истакнува балканскиот шампион.
ipon.mk/В.Д.
