Потврдено: На Мејведер му е одземена титулата во ВБО верзија!

Американскиот боксер имаше рок до петокот да плати 200 илјади долари поради претходни казни, но не го сторил тоа и комитетот едногласно донел одлука титулата да му биде одземена. Место него, шампион во велтер категорија во верзијата ВБО е Тимоти Бредли Јуниор, кој минатиот месец го совлада Џеси Варгас во борба за привремената титула. Мејведер има 14 дена да се жали на одлуката, но таа најверојатно нема да биде сменета.

„Комитетот на ВБО немаше друга алтернатива освен да донесе одлука за одземање на шампионската титула на господинот Флојд Мејведер поради негово неизвршување на обврските. Тој секогаш се согласувал со нас дека боксерите имаат привилегии и обврски и дека постојат правила кои треба да се почитуваат”, се вели, меѓу другото, во соопштението од ВБО.