Непоразен тешкаш во подем сака борба против Мозес Итаума

Дваесетгодишната британска ѕвезда Мозес Итаума има сериозни планови во 2026 година, а првото нешто на неговата листа на желби е да се бори за светската титула.

Оваа година, младиот борец од Кент го зголеми својот скор на 13 победи во 13 борби, од кои 11 ги доби со нокаут во првите две рунди.

Неговиот последен настап беше во август кога за две минути го нокаутира сонародник и предизвикувач за светската титула Дилиен Вајт.

Итаума има неколку планирани борби за следната година, а пред потенцијалната пресметка со привремениот шампион на ВБА, Мурат Гасиев, во јануари ќе влезе во рингот против Џермејн Френклин.

Но, Мозес е на списокот на некои други борци, а еден од нив е 26-годишниот американски талент во подем, Ричард Торез.

„Навистина ја сакам таа борба. Подготвен сум за мечот против Итаума. Мислам дека е смешно да се видат сите овие момци како го повикуваат Ентони Џошуа, сите сакаат да се борат со постари борци. И јас сум тука како го повикувам Итаума. Ја сакам таа борба – рече Ричард Торез и продолжи:

„Двајца момци кои се во врвот на своите кариери и работат напорно за да бидат некој. Мислам дека сега е вистинското време да се докажат. Навистина верувам дека ова ќе биде една од оние мега борби што би можеле да ги имаме и која навистина ќе покаже кој е кој. Ни треба борба за да видиме кој е шефот“.

Американецот ги пофали досегашните резултати на Мозес.

„Тој го напиша своето име со задебелени букви со убедливи победи и заслужува почит. А неговите промотори одлично му ја работат и правилно ја управуваат кариерата. Но, исто како што се борел со многу момци, и јас се борев со некои прилично добри борци. Мислам дека нему му треба вистинска борба, а јас би можел да бидам тој противник. Навистина мислам така“, подвлече Ричард Торез.

Непоразениот американски борец (14-0, 12 нокаути) го победи Гвидо Вијанело на поени во април, а во ноември со прекин во првата рунда го победи Томаш Шалек.