Мејведер го тужи „Шоутајм“ за 340 милиони долари: Ќе се борам на суд како што се борам во рингот

Флојд Мејведер Јуниор поднесе тужба против телевизиската мрежа Шоутајм, обвинувајќи ја за учество во измамничка шема за која, според него, го лишила од 340 милиони долари.

Според ТМЗ, повикувајќи се на тужба поднесена во Калифорнија, поранешниот светски шампион тврди дека бил жртва на долгорочна и сложена финансиска измама и бара да врати стотици милиони долари.

Во тужбата како обвинети се наведува извршниот директор на Шоутајм и Шоутајм спорт, Стивен Еспиноза. Во тужбата се тврди дека тие му помогнале на долгогодишниот советник на Мејведер, Ал Хејман, во организирањето на шемата, иако самиот Хејман не е именуван како обвинет.

Мејведер истакнува дека неговите најпрофитабилни борби – против Мани Пакијао и Конор Мек Грегор – биле емитувани на Шоутајм, и ги обвинува мрежата и Еспиноза за пренасочување на приходите кон сметки контролирани од Хејман.

Во документот, исто така, се наведува дека кога новиот тим на боксерот побарал сметководствена евиденција од Шоутајм, им било кажано дека документите се изгубени во поплава.

Адвокатот на Мејведер, Боби Самини, коментираше овој случај за ТМЗ:

„Флојд е една од најголемите ППГ ѕвезди. Тој му донесе на Шоутајм стотици милиони долари. Сега Мејведер ќе се бори на суд за да ги врати парите. Откако се повлече со резултат од 50-0, тој ќе се бори од далечина на суд, исто како што правеше во рингот“.