Женската екипа во борби на КК Макпетрол на Светскиот куп Лашко во Словенија го освои првото место во конкуренција на репрезенттаивни состави. Моника Стефановска,Наташа Стефановска и Симона Заборска викендов се пред уште еден предзивик пред Европското првенство во Монпелје, Франција, тоа е турнирот во Салзбург-Австрија, од Карате 1 Премиер лигата.
На Светскиот куп – Лашко во Словенија остваривте исклучително вреден резултат – прво место во екипна конкуренција и тоа во борба со официјланите репрезентации на неколку земји аспиранти за висок пласман Европското првенство во Монпелје, Франција.
Што ви вдахна мотив за да стигнете на врвот?
Моника: Кај нас секогаш постои мотивот за да направиме успех. Но, според мене, повеќе е изразен во екипниот дел, каде што задоволството при освојување медал и остварување успех е поголемо отколку во поединечното натпреварување, што може и да се согледа од изминатите екипни резултати.
Симона: И покрај нашата подготвеност не успеавме да освоиме пласман во поединечна категорија, а тоа беше мотив плус да се докажеме во екипниот дел каде покажавме дека навистина бевме подготвени. За да оствариме добар резултат, како екипа сме многу компактни и дадовме максимум и успеавме да ги победиме и најдобрите во Европа.
Наташа: Меѓусебното секојдневно вежбање во нашиот клуб и меѓусебната мотивација која што си ја даваме една на друга не тераат да напредуваме. Минатата година како женски тим имавме исклучително висок резултат на репрезентативно ниво –5-то место на Европското првенство во карате. Освоивме и бронзен медал на Балканското првенство во 2015 година. Сето тоа придонесе да се појави уште поголема желба и мотивација за поголеми успеси.
За оние што го следеа Блаканското првенство во Истанбул ова е изненадувачки настап, бидејќи во Турција многу бавно, успорено, ги изведувавте ударите и техниките. Што се случи за две недели, за да експлодирате и да го освоите првото место во така силна конкуренција?
Моника: Балканското првенство ни беше добра поука, а и мотивација за ова натпреварување. Ги согледавме грешките од ова првенство,ги елиминиравме и настапивме многу посамоуверени, помотивирани и со поголема желба за победа.
Симона: Можеби психолошкиот момент беше пресуден за да стигнеме до едно такво високо одличје на светскиот куп во Лашко
Наташа: Балканското првенство ни беше прв поголем натпревар оваа сезона. Спортистите доживуваат и порази. Но, од поразот мора да извлечеме поука и да се поправиме со цел да постигнеме повеќе на следното натпреварување. Така и ние, мотивација ни беше можеби и поразот, но и формата се подигна на уште повисоко ниво. Го дадовме максимумот.
Дали ова значи дека на ЕП ќе гледаме репрезентација која ќе се бори за врвот?
Моника: Со оглед на тоа дека овој медал го освоивме борејќи се и победувајќи многу квалитетни репрезентации, минатогодишниот пласман од 5-тото место и најголем успех во женска екипна конкуренција на едно Европско натпреварување во Македонија, а и искуството ни покажа дека ништо не е невозможно, сметам дека сме сериозен конкурент за Европски екипен медал.
Симона: Секако сите ние сме со позитивна мисла дека на европското првенство ќе имаме успешен настап за да ја оправдаме нашата посветеност и, секако, ќе целиме на медал.
Наташа: Секако. Ние се надеваме на уште поголем успех од минатото Европско првенство. Групирани и мотивирани сме и желбата за медал постои. Ќе дадеме се од себе за медал на Првенството.
Дали борбите на женската екипа се во сенка на машката?
Моника: Борбите на женската екипа пред периодот на нашите успеси можеби биле во сенка, но сега не е веќе така.
Симона: Не би рекла дека женските екипи се во сенка на машките, ценам дека сме рамноправни.
Наташа: Можеби пред неколку години биле, меѓутоа, откако се потврдивме како цврста и компактна женска екипа, не треба веќе да постојат тие разлики.
Ipon.mk/В. Д.
