Конор Мек Грегор официјално влегува во трката за претседател: Нашите деца се напуштени, мора да ги спасиме (ВИДЕО)
Конор Мек Грегор, поранешен ММА борец и најпознатото ирско спортско име во изминатата деценија, повторно го привлече вниманието на јавноста – овој пат објавувајќи дека сака да влезе во претседателската трка.
Во видео снимено пред зградите на ирската влада во Даблин, 37-годишниот Мек Грегор ги повика граѓаните да ги контактираат локалните советници и да ги замолат да го номинираат за претседателските избори закажани за 24 октомври. Видеото трае малку повеќе од две минути, а во него Мек Грегор се осврна на политиката на сегашната влада, зголемувањето на бездомништвото кај децата и – како што нагласи – „интензивниот прилив на масовна миграција“.
„Добро утро, граѓани на Ирска. Стојам тука пред канцеларијата на Таоизах и Танаист, каде што сме сега повеќе од 200 дена од формирањето на сегашната влада. Тие ни ја одзедоа безбедноста, мирот и надежта за иднината. Бездомништвото кај децата достигна невидени нивоа, додека владата го игнорира ветувањето од Прогласот дека децата во Ирска мора да бидат безбедни. Наместо тоа, нашите деца се напуштени“, рече Мек Грегор, додавајќи дека „опасноста на улиците е зголемена, а туризмот драстично е намален“.
Citizens of Ireland, the time for real change is now!
As President, I will not sign any bill in law until it goes back to the people first!
If you want to see my name on the ballot for the Presidency, I urge you to contact your local county councillors today and ask them to… pic.twitter.com/LGDCSGN9vr
— Conor McGregor (@TheNotoriousMMA) September 4, 2025
Мек Грегор рече дека се гледа себеси како „мајстор на боречки вештини и човек ориентиран кон решенија“ и е подготвен да дејствува.
„Денес сум пред овие врати, но како ваш претседател ќе влезам во името на народот. Единствен приоритет: да ја заштитиме Ирска што ни ја оставија нашите татковци основачи. Под мое водство, гласот на народот ќе се чуе“, рече тој, завршувајќи го видеото со знакот на крстот и пораката „Гласајте за Мек Грегор за претседател“.
Според правилата, кандидатите за претседател на Ирска мора да имаат над 35 години и да обезбедат номинација од најмалку 20 членови на Оирехтас (Даил Еиреан или Сенад) или четири локални совети.
Мек Грегор тврди дека веќе ги обезбедил потребните потписи.
„Ги имам советите, ги имам ТД и сенаторите, дури и најпрестижната партија од сите. Сега е само прашање на мојот иден политички сојуз. Ќе одговорам на ирскиот повик. Тука сум заради народот“, напиша тој на социјалните мрежи минатата недела.
Сепак, не ги откри имињата на овие наводни политички сојузници. Како ќе се одвива оваа политичка авантура, останува да се види.
