На почетокот на годината беше направен обид да се организира меч за апсолутниот светски шампион во тешка категорија меѓу шампионот на ВБЦ Тајсон Фјури и Александар Усик, кој ги носи појасите ВБА (Супер), ИБФ и ВБО.
Ромскиот крал постојано доаѓаше со нови барања, кои Усик ги издржа извесно време, но кога тоа продолжи, Украинецот едноставно се повлече од преговорите.
И двајцата тргнаа по својот пат. Усик боксираше и го победи предизвикувачот на ВБА Даниел Дубоа со нокаут во деветтата рунда минатиот викенд, додека Фјури ќе се бори со Френсис Нгану на 28 октомври. Влогот во натпреварот нема да биде појасот на ВБЦ.
Веќе неколку дена кружи приказната дека борбата за обединување на титулите меѓу Фјури и Усик повторно се договара, а тоа сега го потврди и Френк Ворен, промоторот на шампионот на ВБЦ.
„Жалбата на Дубоа нема да влијае на преговорите за мечот меѓу Усик и Фјури, бидејќи сакаме таа борба да ја организираме на почетокот на следната година. Но, ако има реванш меѓу Усик и Дубоа, тогаш дуелот за апсолутниот шампион може да се договори за подоцна“, истакна Френк Ворен и повтори дека Дубоа бил оштетен на мечот против Усик:
„Планиравме следната година победникот од тој дуел да се бори со Тајсон Фјури. Ќе собереме фотографии и снимки од мечот, а сите докази ќе ги дадеме на суд на надлежните органи и ќе ја чекаме нивната одлука“.
