Првакот на УФЦ во тешка категорија, Френсис Нгану, допрва треба да потпише со промоцијата. Во јануари камерунскиот борец го одбрани појасот на мечот против Сирил Гане, а договорот со најголемата светска ММА промоција беше продолжен за уште три меча, односно за една година.
Предаторот беше опериран на коленото неколку недели подоцна и го користи времето за закрепнување за да преговара за некои услови со УФЦ во новиот договор.
Освен поголема плата, главен услов му е можноста за бокс. Камерунецот многу сака да се испроба во рингот, а Тајсон Фјури е прв на неговата листа.
Во едно неодамнешно интервју тој кажа мислење за моменталниот статус во УФЦ.
„Се е исто како пред неколку месеци, а истото е и со договорот. Не добив никаква понуда. Но, не брзаме, ниту јас не одам никаде“, рече Френсис Нгану и додаде:
„Се уште сум заинтересиран за борбата против Тајсон Фјури. Како и да завршат овие преговори, боксерскиот меч мора да биде вклучен во договорот“.
По целосното санирање на повредата Нгану би можел да се врати на борбите во првата половина на следната година.
