Промоторот на Џо Џојс Френк Ворен е подготвен да договори следната борба на неговиот боксер да биде против Дионтеј Вајлдер.
„Немам проблем да ја направам оваа борба. Апсолутно, нема проблем, ако е таму и може да се направи, би сакал да го направам тоа. Зошто да не се обидеме да ја водиме оваа борба? Тоа би било голема борба. Нема проблем“, изјави Ворен за ИФЛ ТВ.
Непоразениот Џојс е актуелниот задолжителен предизвикувач на ВБО. Титулата ја држи Александр Усик, кој, пак, ќе се сретне со Ентони Џошуа во реваншот за ВБА Супер, ВБО, ИБФ и ИБО појасите на 20 август во Саудиска Арабија.
„Можете ли да замислите дека Џо ги задава своите удари во брадата (на Вајлдер). Тоа не е проблем. Можеби ќе разговарам со (менаџерот на Вајлдер) Шели (Финкел) за борбата“, коментираше промоторот.
Сепак, тешко дека таборот на Вајлдер ќе ризикува со ваква борба при враќањето на „Бронзениот бомбардер“ во рингот.
Поранешниот светски шампион на ВБЦ не се борел од октомври 2021 година. Тогаш Тајсон Фјури го нокаутира Дионтеј Видер во 11-тата рунда во главниот настан на гала борбата што се одржа во Лас Вегас. Борбата беше за светската титула на ВБЦ во тешка категорија. Во натпреварите меѓу двајцата „Џипси кинг“ води со 2 победи, а првата пресметка заврши нерешено.
Вајлдер во професионалната боксерска кариера има учинок од 42 победи (41 со нокаут), 1 реми (против Тајсон Фјури) и 2 порази (и двата од „Џипси кинг“).
Џојс нема пораз во професионалниот боксерски ринг. 36-годишниот англиски боксер има биланс од 14 победи на 14 средби (13 со нокаут). Во претпоследната борба Џојс го нокаутираше Карлос Такам на боксерската гала одржана во Вембли Арена на 24 јули 2021 година, а пред неколку дена ја забележа првата ппобеда во 2022 година – нокаут во четвртата рунда против Кристијан Хамер. Џојс е и сребрен медалист на Игрите во Рио де Жанеиро во 2016 година.
„Џо се бори на 24 септември. Работиме на противниците. Работевме пред борбата, надевајќи се дека ќе победи, што и успеа. Сакаме да бидеме во позиција да објавиме нешто за тоа на почетокот на следната недела и да имаме билети во продажба. Тоа е она што се обидуваме да го направиме“, додаде Ворен.
