На 17 февруари Тајсон Фјури и Александар Усик ќе боксираат во меч за апсолутен шампион во тешка категорија, а потоа се очекува брзо да договорат реванш.
ВБЦ деновиве потврди дека Ентони Џошуа и Дионтеј Вајлдер, чиј меч за март следната година го најави промоторот Еди Херн, би можеле да се борат во елиминаторски меч за нивниот шампионски појас, пишува Скај спорт.
Тоа би бил најголемиот финален елиминатор во историјата на боксот.
А Џошуа и Вајлдер ќе настапат пред нивното соочување на 23 декември.
Настанот во Ријад треба да биде предводен од мечот меѓу Еј Џеј и Ото Валин, додека Бронзениот бомбардер ќе се соочи со Џозеф Паркер.
Доколку победат Вајлдер и Џошуа, тогаш ќе се отвори патот за договор на нивната меѓусебна борба следната година, која треба да има посебна тежина.
Маурицио Сулејман, претседателот на ВБЦ, истакна дека неговата организација го поддржува мечот за апсолутен шампион во тешка категорија.
„Секогаш сме ја поддржувале идејата да имаме апсолутен шампион“, изјави Маурицио Сулејман за Скај спорт и продолжи:
„Кога Вајлдер беше шампион имаше неколку можности во кои можеше да се договори меч против Џошуа, но ВБЦ не сакаше да се меша. А потоа дојде Фјури кој беше подготвен да се бори со Џошуа, а потоа и со Усик. Главниот комитет на ВБЦ ја одобри борбата на Фјури против Усик во февруари, а потоа и реванш. Што се однесува до ВБЦ, се договоривме да се одржат двете борби“.
Настанот на 23 декември во Саудиска Арабија може да обезбеди задолжителен предизвикувач за титулата на ВБЦ во тешка категорија, која моментално ја држи Фјури.
„Дефинитивно се работи за елиминациски турнир на ВБЦ. Го имате Вајлдер, кој е предизвикувач број 1, а тука се и Џошуа, Паркер, Валин… Сите тие се високо рангирани на ВБЦ ранг-листата. По 23 декември може да има промени во редоследот“, истакна Маурицио Сулејман и додаде:
„Се чини дека се води кон судир меѓу Вајлдер и Џошуа. Тоа многу добро би можело да биде крајната елиминациска борба која ќе обезбеди задолжителен предизвикувач за титулата на ВБЦ. Неверојатно. Тој меч би ги воодушевил љубителите на боксот. Среќен сум што промоторите и менаџерите соработуваат. Се разбира, има многу пари, но мора да ги заработите. Можете да сонувате за било што, но ние го чекаме ова долго време. И сега е совршен момент за влез во втората ера на боксот. Ќе го поддржиме натпреварот меѓу Вајлдер и Џошуа“.
