Боксерскиот промотор Еди Херн не се согласува со неодамнешната изјава на Тајсон Фјури дека мора да бара нокаут во реваншот доколку сака да го победи Александар Усик.
Пред нешто повеќе од еден месец во Ријад се одржа меч за обединување на шампионските појаси во тешка категорија, во кој Усик со поделена одлука го победи Фјури.
Кралот на Ромите и натаму верува дека направил доволно за триумф и не може да се помири со поразот од Украинецот, но може да го подобри впечатокот на 21 декември кога е договорен реваншот.
Херн верува дека поранешниот шампион на ВБЦ може со одлука да го победи Усик доколку вечерта покаже срце и агресивност во рингот.
Во нивната борба на 18 мај Фјури поголемиот дел од времето го помина свртен со грбот на јажињата и го гледаше украинскиот борец со презир, изгледајќи како постар боксер кој не може да се бори на средината на рингот.
А потоа дојде деветата рунда во која Фјури беше соборен. Судијата мораше да му брои на Фјури, а кога мечот требаше да продолжи, звукот на гонгот означи крај на рундата.
На крајот од мечот Британецот не направи ништо за дополнително да ја заслужи наклонетоста на судиите, а на крајот Усик победи со поделена одлука на судиите (115-112, 113-114, 114-113).
„Сигурно не мислам дека Тајсон Фјури бил ограбен или немал среќа што не победил. Повеќето веруваат дека Усик заслужено победи. Но, борбата беше многу блиску, а Фјури можеше да направи нешто повеќе на крајот за да стигне до триумфот“, изјави Еди Херн во интервју за каналот на Чарли Парсон на Јутјуб и додаде дека не се согласува со размислувањето на Фјури за реваншот:
„Воопшто не се согласувам со Фјури, кој вели дека може да го победи Усик во реваншот само со нокаут. Но, јасно е дека Усик може да победи на поени ако боксира како што знае. Ми се допаѓа неговиот менталитет, но ќе биде важно да се донесат правилни одлуки. Ако Фјури влезе многу поагресивно во реваншот, тогаш може да го победи Усик, дури и на поени“.
