Најдобриот хрватски боксер Филип Хрговиќ (15-0) се враќа во рингот, а на 12 август во лондонската О2 арена ќе се бори со Демси МекКин (21-0).
Нивниот судир ќе биде конасловна борба на настанот предводен од мечот меѓу Ентони Џошуа и Дилиен Вајт.
А победникот од дуелот Хрговиќ-МекКин, како задолжителен предизвикувач на ИБФ, ќе биде првиот во редот за соочување со подобриот од борбата во која Александар Усик ги брани шампионските појаси против Даниел Дубоа.
„Победата против Хрговиќ ми го носи местото задолжителен предизвикувач и борба против подобриот од мечот Усик – Дубоа. Велат дека добри работи им се случуваат на луѓето кои чекаат, а јас чекав доволно и конечно ми се случи нешто добро“, изјави Демси МекКин и додаде:
„Посакувам да имам уште една борба пред оваа, но се покажа одлично. Среќен сум што се договоривме за мечот и сега сум целосно посветен на борбата против Хрговиќ. Се подготвував долго време и направив многу спаринг-рунди, а ја задржав формата и боксерскиот коефициент на интелигенција“.
Австралиецот добро го анализираше последниот меч на Хрговиќ против Кинезот Жилеј Жанг.
„Висок е 198 сантиметри, боксира во контра, така сме слични. Но, јас сум повешт од Џанг, многу помобилен од него. Можеби ќе погоди посилно, но јас подобро ги поврзувам моите удари. На Хрговиќ ќе му биде многу потешко да боксира против мене – рече Демси МекКин и подвлече:
„Сакам да покажам врвна борба и се надевам на одличен меч. Се подготвувам за 12 рунди, но ќе побарам прекин. Ми треба одмор за да ја осигурам победата. Ќе ги шокирам сите, па и Хрговиќ“.
