Девет дена нè делат од големиот боксерски реванш, еден од најочекуваните оваа година. Артур Бетербиев и Дмитри Бивол повторно ќе се борат за сите четири светски титули во полутешка категорија.
Првиот меч го имаа на 12-ти октомври минатата година и после таа борба се крена голема прашина. По цели 12 рунди се чекаше судиската одлука и впечатокот во јавноста беше наклонет кон победа на Бивол. Сепак, Бетербиев победи со мнозинска одлука (114-114, 115-113, 116-112), што наиде на многу критики од навивачите.
Се споменуваше и дека присуството на Рамзан Кадиров имало влијание врз крајниот исход на мечот, особено откако тој влегол во рингот и се прегрнал со Бетербиев. Јасно беше дека реваншот е повеќе од потребен и Турки Алалших не се двоумеше предолго. Тој ги спои двајцата најдобри полутешкаши, го одреди датумот за реваншот, а јавноста со нетрпение ја очекува борбата.
Многу важен меч за двајцата. Дмитри Бивол до првиот меч беше непоразен, а доколку доживее втор последователен пораз, никој нема ни да зборува за потенцијално „украден“ на првиот меч. Бетербиев ќе докаже дека е едноставно подобар и приказната ќе заврши. Од друга страна, Артур Бетербиев се уште е непоразен, но очигледно има некои дамки на првата победа над Бивол. Артур ќе се обиде да ги испере со поубедлива победа, но интересно е што смета дека немало неизвесност ниту на првиот меч.
„Беше добра борба, но не беше тесна“, изјави Бетербиев за Скај спорт.
Don't say the first fight was close around Beterbiev 😂#BeterbievBivol2 | Feb 22 | #RiyadhSeason | Sky Sports Box Office pic.twitter.com/uS5Vdnexi9
— Sky Sports Boxing (@SkySportsBoxing) February 10, 2025
Можеби се залажува, или можеби едноставно се обидува да му влезе под кожа на противникот. Во секој случај, реваншот ќе даде одговори на бројни прашања, а нам ни останува само уште малку да бидеме трпеливи и да чекаме нова пресметка на двајца фантастични боксери.
