Даниел Кормиер загрижен за враќањето на Мек Грегор против Холовеј

Даниел Кормиер призна дека не се сомнева во желбата и мотивацијата на Конор Мек Грегор пред неговото враќање во УФЦ, но според него, има премногу непознати пред Ирецот.

На 11 јули Мек Грегор ќе се врати во октагонот по речиси петгодишно отсуство, кога ќе се соочи со Макс Холовеј во главниот настан на УФЦ 329 во Т-Мобиле арена во Лас Вегас.

Во поткастот WEIGHING IN со Џош Томпсон, Кормиер коментираше за претстојниот судир и призна дека и покрај очекуваната максимална концентрација од Мек Грегор, задачата изгледа исклучително тешка.

„Мислам дека ќе го видиме Конор Мек Грегор, кој е фокусиран и посветен како што бил отсекогаш“, рече Кормиер.

Сепак, поранешниот шампион во две категории, нагласи дека има премногу прашалници околу враќањето на Ирецот – долгото отсуство, сериозната повреда на ногата, зголемувањето и губењето на тежината, како и недостатокот на вистинска борба со години.

„Не знам дали овој Конор Мек Грегор, дури и ако е помотивиран од кога било, е доволен за да го победи Макс Холовеј. Ова не е предвидување – само го кажувам“, додаде Кормиер.

Тој беше категоричен и во врска со долгата пауза надвор од кафезот:

„Не стануваш подобар во нешто ако не го правиш. Можеш да тренираш колку сакаш, но на крајот на краиштата, поминаа околу пет години откако последен пат беше во октагонот“.

Мек Грегор последен пат се бореше во 2021 година кога претрпе тешка повреда на ногата во трилогијата против Дастин Пориер.

Претстојната борба со Холовеј ќе биде реванш на нивната прва средба во 2013 година, тогаш Мек Грегор победи со едногласна одлука. Но, сега, многумина веруваат дека Ирецот се соочува со еден од најголемите предизвици во неговата кариера.