Усик: Можам да го подготвам Џошуа да го победи Фјури

Александар Усик е уверен дека може да го подготви Ентони Џошуа да го победи Тајсон Фјури и да ја врати неприкосновената титула во тешка категорија.

Џошуа тренира со Усик откако се врати во сала по сообраќајната несреќа минатиот декември. Британецот планира да се бори во јули пред да го реши долгогодишното соперништво со Фјури во ноември. Џошуа не победил признат боксер откако го победи Ото Валин пред речиси три години.

Потоа ја нокаутира ѕвездата на мешани боречки вештини Френсис Нгану пред да биде поразен од Даниел Дубоа на Вембли. Потоа, минатиот Божик, Џошуа го нокаутира видео блогерот Џејк Пол.

Но, Усик, кој ги победи и Џошуа и Фјури по двапати, верува дека може да го врати поранешниот шампион на врвот.

„Знам дека Ентони може да го направи тоа затоа што го гледам како тренира – тој е машина“, рече тој. „Но, мислам дека му треба помош и сите го поддржуваме Еј Џеј. Јас сум фудбалски навивач и понекогаш мојот тим губи, но не велам „Тие се лоши“, туку велам „Овие работи се случуваат и мора да се работи понапорно“.

„Но, понекогаш луѓето кои навиваат за тим или борец, а тој губи, се негативни. Тие не се навивачи, туку зборуваат глупости. Треба да си помагаме едни на други, а ако не го сториме тоа, не сме луѓе, туку животни. Мислам дека е подготвен да се бори, но му треба време бидејќи има проблем со своето тело по инцидентот“.

Фјури се бореше за прв пат по поразот од Усик во реваншот кога на поени минатиот викенд го победи Арсланбек Махмудов. Промотерот на Џошуа, Еди Херн, е уверен дека ќе се постигне договор.

„Го добивме договорот на крајот од минатата недела за две борби“, рече тој. „Договорот што ни го понудија не е веднаш да се бориме со Тајсон Фјури; очекуваме тој да излезе во јули, а потоа да се бори со Фјури во ноември“.