Историски успех за македонското традиционално таеквондо: Владимир Димитриевиќ освои бронза на Светски куп во Солун

На Светскиот куп „Кинг оф такевондо“ во Солун најголемиот успех го постигна сениорот Владимир Димитриевиќ во спаринг -78 килограми. И покрај повредата здобиена поради густиот натпреварувачки распоред во изминатиот период, тој успеа да освои бронзен медал – прв медал за МТТФ од Светски куп.

„Во елиминационата фаза го совлада домашниот натпреварувач Георгиос Акалдис, а во четвртфиналето забележа победа над претставникот од Естонија. Во полуфиналниот меч беше поразен од натпреварувачот од Украина, со што не успеа да се пласира во финалето и борбата за златен медал“, вели претседателот на МТТФ, Марјанчо Лазаревски и додава:

„Со овој резултат, Владимир Димитриевиќ ја заокружува 2025 година онака како што и ја започна – со историски успех во сениорска конкуренција. Овој медал претставува значаен чекор напред за МТТФ и македонското таеквондо и е јасен показател дека ИТФ таеквондо спортот се стреми кон врвот и позицијата спорт број 1 во Македонија“.

Миа Танеска настапи во категорија јуниори – црвен појас, форми (борба со замислен противник), во конкуренцијата на 38 натпреварувачки. Стигна до четвртфиналето, каде што беше поразена во борбата за медал и влез во полуфинале, освојувајќи го високото 9-то место. Додека во спаринг категорија јуниори до +55 кг, и покрај прикажаната борбеност и квалитет, не успеа да ја совлада противничката и беше елиминирана во раната фаза.

На овој Светски куп настап треба да има и Даниел Стојаноски, кој за првпат ќе ја претставува МТТФ во кадети до -40 кг.

МТТФ настапува со тројца натпреварувачи под водство на националниот тренер Саша Поповски, потпретседателот на МТТФ Зоран Парулески и Христијана Парулеска како судија од МТТФ.

На натпреварот учествуваат над 1400 натпреварувачи од 21 држава од целиот свет.