Шампионот на УФЦ во перо категорија Илија Топурија (15-0) изрази желба да се бори со суперѕвездата на организацијата и поранешен шампион во две дивизии Конор Мек Грегор (22-6).
„Тоа е како книга. Претставува цело поглавје во историјата на ММА. Верувам дека дојде време да се затвори ова поглавје и да се започне ново. Верувам дека борба со него, победа над него, ќе биде крај на едно поглавје и почеток на друго – ново поглавје“, изјави Шпанецот.
Топурија го нарече Мек Грегор „совршениот херој“ во историјата на ММА. Тој вели дека неговата цел е „да ги развие мешаните боречки вештини, да ги популаризира“.
„Колку повеќе луѓе учат за ММА преку мене, толку подобро. Токму ова е вид на работа што сакам да ја работам“.
Илија тврди дека наскоро со шефовите на УФЦ ќе разговара за проектот за одржување турнир во Шпанија. „Ова не е лесна задача. Но, првите чекори во оваа насока се веќе направени. Дали Конор ќе биде мојот противник? Не го знам тоа. Но, не би бил изненаден ако биде тој“.
