Речиси неверојатни вести ни доаѓаат од најпознатата организација за слободни борби во светот, УФЦ. Ноќта од среда кон четврток и официјално беше потврдено дека американската антидопинг агенција УСАДА повеќе нема да биде присутна во програмата на УФЦ, пренесува Вечерњи лист.
Од 2015 година УСАДА соработува со УФЦ, а резултатите од таа соработка го подигнаа нивото на организацијата. Борците кои беа под допинг паднаа на тестовите, а тоа беше најмногу предизвикано од активно и ненајавено тестирање на борци, а тоа е нешто со што не можеа да се пофалат другите големи ММА организации.
Сепак, се чини дека УФЦ реши да направи чекор назад со раскинување на соработката со агенцијата, а главна причина за тоа е враќањето на популарниот Ирец Конор Мек Грегор во октагонот.
Имено, претседателот на УФЦ, Дана Вајт, побара Мек Грегор, за кого во јавноста е познато дека користи дрога и недозволени супстанци откако паузираше од борбите, да биде исклучок од програмата на УСАДА, со што луѓето од агенцијата не сакаа да се согласат.
Мек Грегор ќе мораше да биде чист од сите супстанции шест месеци пред неговата прва борба за враќање, а Ирецот не сакаше да игра според тие правила.
За жал, во таа ситуација, претседателот на УФЦ го стави профитот од враќањето на Конор пред регулаторните тела за фер борби.
„Кој знае како ќе се одвива ситуацијата со Конор? Кому му е грижа што вели УСАДА?“, зборуваше пред неколку месеци претседателот на УФЦ Дана Вајт, кој јасно стави до знаење кои се неговите намери и визии.
Сега дојде до ненадеен пресврт.
„Долгорочното здравје и безбедност на борците, заедно со фер и еднакви услови за сите, се поважни за УСАДА отколку краткорочниот профит на сметка на спортистите кои се чисти. Односите беа нарушени кога посочивме дека Мек Грегор ќе мора да биде „чист“ шест месеци пред неговата камбек борба – меѓу другото“, рече шефот на УСАДА Тревис Тајгарт во своето видување на ситуацијата, додавајќи:
„Не дозволуваме борците без одобрена медицинска основа да користат лекови за подобрување на перформансите едноставно за да се вратат во октагонот што е можно побрзо. Разочарани сме од борците на УФЦ кои се потпираат на нашата независна глобална програма „златен стандард“ за да ги заштити нивните права да се борат чисто и безбедно во октагонот. Потегот на УФЦ го загрозува огромниот напредок што спортот го постигна под УСАДА“.
Конор Мек Грегор наскоро би требало да се врати во октагонот по повеќегодишна пауза поради скршеница на ногата, а негов веројатен противник е Мајкл Чендлер.
