Тензиите растат: Канело ја доведува во прашање класата на Крофорд пред нивниот мега судир во Лас Вегас

Втората официјална прес-конференција меѓу актуелниот шампион во суперсредна категорија, Сoл Алварез-Канело и Теренс Крофорд, одржана во Њујорк, беше многу пожестока од отворањето во Ријад. Двете ѕвезди не само што разменија зборови, туку дури и физички се судрија на сцената, демонстрирајќи дека нивната пресметка на 13 септември во Лас Вегас ќе биде повеќе од спортски настан – тоа ќе биде судир на амбиции, наследства и ега.

Канело, кој ги држи сите титули во суперсредна категорија, отворено го доведе во прашање квалитетот на противниците во кариерата на Крофорд, иако Американецот е неприкосновен светски шампион во две тежински категории.

„Не ме сфаќајте погрешно, тој е добар борец, одличен“, рече Мексиканецот. „Но, наведете ми еден елитен борец во неговата кариера. Само еден“.

Крофорд не се воздржа: „Постол не беше елитен? Рики Барнс?“, праша тој.

Сепак, Канело ги минимизираше тие имиња: „Во моментов, 40-годишен поранешен шампион го победи Виктор Постол во мојата сала. Тие се добри борци, но елитните борци се на друго ниво“.

Вербалната размена заврши со силен одговор од Крофорд: „Тоа значи дека ќе се борам со елитен борец во септември“, на што Алварез ладнокрвно одговори: „Да, ќе го направиш тоа. И се надевам дека твојот чичко Турки Ал-Ашеик те платил добро, бидејќи тоа е твојата последна плата“.

И покрај притисокот, Крофорд покажа непоколеблива самодоверба:

„Кога ќе победам, ќе бидам на самиот врв. Постои причина зошто не ги добив овие големи борби порано – Бог ме подготвуваше за овој момент. Моето време дојде. Ќе бидам првиот апсолутен светски шампион во три тежински категории“.