Поранешниот шампион на УФЦ во тешка категорија будно ќе ја следи борбата меѓу Сирил Гaнe и Џон Џонс.
Сите се прашувавме каде отиде Стипе Миочиќ во комбинациите за напад на титулата, особено откако Френсис Нгану го напушти УФЦ. На најсилната светска ММА организација и беа потребни двајца борци за да се борат за испразнетиот трон.
Сигурно беше дека еден од нив ќе биде Џон Џонс, а иако „Коски“ не крие дека сака да се бори со Миочиќ бидејќи Стипе, според него, е најголемиот тешкаш во историјата, сепак УФЦ се одлучи за втората опција. Сирил Гане е нивниот избор, а со оглед на тоа дека Французинот е прворангираниот борец на листата на предизвикувачи на УФЦ во тешка категорија, тешко е да се каже дека тоа беше изненадување.
Хрватско-американскиот борец Стипе Миочиќ нема настап од март 2021 година и поразот од Френсис Нгану. Во периодот потоа Стипе беше прилично притаен за медиумите, но синоќа на Јутјуб се појави неговото ново интервју со Даниел Кормиер. Миочиќ седна со големиот ривал и откри дека би сакал да настапи на настанот УФЦ 285, но не се укажа прилика.
„Да, секако дека би сакал. Моето наследство би било уште поголемо. Но, и ова е добар меч (Гане против Џонс), а кој и да победи ќе биде мојот следен противник. Ќе претепам еден од нив“, изјави Миочиќ, а потоа ја откри главната вест.
„Да, УФЦ ми кажа дека ќе се борам во јули, на Меѓународната недела на борбите. Така ми беше кажано и токму тоа го сакав“, додаде Стипе.
Настанот УФЦ 290 ќе се одржи во јули оваа година, а точниот датум на тој настан е 8 јули 2023 година. Миочиќ очигледно треба да го предводи настанот борејќи се против новиот шампион кој ќе биде крунисан во недела во раните утрински часови, но оваа информација треба да се земе со резерва.
Имено, прашање е дали победникот од мечот меѓу Џонс и Гане ќе може да се бори веќе во седмиот месец, бидејќи можеби ќе бидеме сведоци на вистинска војна од која и двајцата ќе излезат со повреди кои ќе ги спречат многу брзо да се вратат во кафезот. Да се надеваме дека нема да биде така и дека Стипе навистина ќе го нападне појасот во јули оваа година.
Комплетниот разговор на Миочиќ со Кормиер погледнете го во видеото под овој текст.
