Во сениорска конкуренција за најуспешен клуб на 6. Меѓународен џудо турнир „Миоки опен“ беше прогласен ЏК Локомотив од Софија, додека пак кај сениорките домаќинот ЏК Миоки. Пехар за најуспешна домашна екипа доби ЏК Миоки. За најуспешна странска екипа беше прогласена екипата на Баликешир од Турција.
Меѓународен турнир „Миоки опен“ се одржа повод меѓународниот ден на џудото во СЦ „Борис Трајковски“ со учество на 37 клуба и 402 натпреварувачи од 12 држави: Бугарија, Грција, Турција, Русија, Албанија, Косово, Црна Гора, Србија, Босна и Херцеговина, Хрватска, Романија и Македонија.
Покрај најдобрите клубови во сениорска конкуренција и во другите возрасни категории беа прогласени најуспешните. Така, за најуспешен клуб кај пионерите и пионерките е прогласен ЏК Пролетер од Прилеп, а кај кадетите ЏК Баликешир од Турција. Кај кадетките најуспешен клуб беше Анкара од Турција.
„Импресивни борби прикажаа Хамза Јашари со освоено злато кај пионерите и сребро, односно бронза кај кадетите и сениорите, како и Берна Шерифовска со злато кај кадетките и сребро кај сениорките“, вели организаторот на турнирот Игор Паскоски од Миоки.
Берн Шерифовска доби пехар и парична награда за најуспешен џудист од Mакедонија за 2015.
Севкупен победник на натпреварот по број на освоени бодови е прогласена екипата на домаќинот Миоки со освоени вкупно 7 златни, 9 сребрени и 13 бронзени медали.
ipon.mk/В.Д.
