Американскиот боксер Флојд Мејведер би можел да има две борби со ирскиот УФЦ борец Конор Мек Грегор, според Сан.
Според изворот, претставниците на Мејведер се во преговори да договорат борба во октагонот, како и боксерски реванш за 1,5 милијарди долари. Доколку страните постигнат договор, тоа ќе биде прва ММА борба за Мејведер.
Натпреварите се очекува да се одржат во Абу Даби и Саудиска Арабија во 2023 година. Флојд навести реванш со Мек Грегор пред неколку недели. „Мани“ оваа година беше доста ангажиран во рингот.
Во мај, Флојд приреди шоу со Дон Мур, успевајќи да доминира над него 8 рунди. Средбата не донесе победник. Кон крајот на минатиот месец Флојд се пресмета со Микуру Асакура, нокаутирајќи го во втората рунда.
Следното шоу на Флојд е закажано за 13 ноември во Дубаи. Легендата ќе боксира со јутјуберот Деџи.
Мек Грегор и Мејведер се бореа пред 5 години во Лас Вегас. Конор се претстави добро во боксерското деби. Флојд на крајот го нокаутира во 10-тата рунда, со што направи 50-0 во професионалниот бокс.
Ова беше последната професионална борба на Мејведер. На прв поглед, нема смисла да се борат овие двајца, но 1,5 милијарди долари можат да направат чуда.
