Непоразениот Александар Усик неодамна го победи Тајсон Фјури со поделена одлука и стана апсолутен шампион во тешка категорија.
Украинецот е првиот борец кој ги обединил четирите најважни појаси на светски шампион во кралската дивизија.
А истото го направи и во ноември 2018 година, кога стана неприкосновен шампион во полутешка категорија победувајќи го Мурат Гасиев.
Американскиот боксер Мајкл Хантер има само еден пораз во кариерата и тоа против Александар Усик во 2017 година.
Хантер пред неколку дена се врати во рингот и го совлада Касиус Чејни, по мечот го прозва Украинецот.
„Би сакал да се борам против Александар Усик. Би бил многу среќен повторно да се пресметам со него“, изјави Мајкл Хантер и додаде:
„Во тоа време не се чувствував добро. Имав некои проблеми надвор од рингот. Пред борбата изгубив неколку килограми, направив многу грешки. Секогаш го добивам подебелиот крај. Ако имав квалитетен тренинг камп и условите што ги имаат Тајсон Фјури или Ентони Џошуа, тогаш ќе беше друга приказна со Усик. Но, не е важно, би сакал да имам реванш против Усик“.
Американскиот борец истакнува дека неговите подготовки за таа борба не биле доволно квалитетни, а се надева на враќање. Не би имал ништо против тоа да биде и во тешка категорија.
Но, тешко дека овој меч би можел да се случи наскоро, бидејќи прво Украинецот го чека реваншот против Фјури, кој беше договорен за 21 декември во Саудиска Арабија.
Апсолутниот шампион неодамна откри дека размислува за враќање во полутешка категорија.
„По реваншот можев да ги намалам килограмите и да се вратам во полутешка. Можеби би можел по втор пат да станам апсолутен шампион во полутешка категорија. Тоа е мојот план“, изјави Александар Усик.
