Конор Мек Грегор е максимално самоуверен пред да се врати во кафезот. Поранешниот шампион во перо и во лесна категорија ќе се бори против Дастин Пориер на УФЦ 257, што ќе се одржи за помалку од две недели во Абу Даби. Ова ќе биде втор дуел меѓу нив, а пред неколку години Мек Грегор победи со нокаут.
Пред една година Конор ја направи последната борба и го нокаутира Доналд Цероне за 40 секунди. Во 2016 година го нокаутира Еди Алварез и ја освои титулата во лесна категорија, со што стана двоен шампион. На својот профил на социјалните мрежи, „Озлогласениот“ сподели дека неговата сегашна форма е врвна и ќе ги уништи неговите претходни верзии.
„Цероне – Мек Грегор и Алварез – Мек Грегор. Ќе ги уништам двете верзии на овие борби. Не си играм. Апсолутно ќе ги уништам двете мои верзии од минатото. 16 дена до борбата“, напиша Мек Грегор.
