Maкедонската карате репрезентација вечерва заминува на 53. Европски шампионат во Нови Сад, Србија, на кој учествуваат 532 натпреварувачи од 52 земји, што е рекорден број држави на континентални шампионати.
Македонија ќе настапи и во борби и во кати со следните каратисти:
Кумите – мажи: Емил Павлов (-60 кг), Ненад Келебиќ (-67 кг), Азиз Исмаил (-75 кг), Берат Јакупи (-84 кг) и Жарко Арсовски (+84 кг);
Кумите – жени: Драгана Манговска (-50 кг), Симона Заборска (-55 кг), Вероника Костовска (-61 кг) и Ангела Мојсовска (+68 кг);
Екипно – мажи: Емил Павлов Берат, Јакуп, Жарко Арсовски, Азиз Исмаил, Доан Османи, Мартин Несторовски и Виктор Крстевски;
Екипно – жени: Наташа Стефановска, Моника Стефановска, Вероника Костовска и Ангела Мојсовска;
Кати поединечно: Фери Исиќ и Поликсенија Јованоска.
Во нашата репрезентација се оптимисти и веруваат дека ќе се вратат со медал од Нови Сад. Исто така и директорот на Агенцијата за млади и спорт, Дарко Каевски, како и стручниот штаб на репрезентацијата, предводена од Стојан Андриевски и Сашко Арсовски веруваат во успех.
Каевски се повикува на традицијата.
„Македонија во изминатава деценија е редовен освојувач на медали, што е единствен случај во сите наши спортови, а особено е важно што минатата година се закитивме и со сребрен и бронзен медал, на првото европско првенство откако каратето стана олимписки спорт. Моите очекувања за настапот во Нови Сад се оправдани ако кажам дека ќе се вратат со освоена медалја, ако се знае дека Емил Павлов, досега освои 2 европски медали од кои еден златен 2014 и бронзен во 2016 година, Берат Јакупи освои две медалји, сребрен во 2017 и бронзен во 2013 година, Жарко Арсовски беше бронзен на светското првенство 2010 година додека Мартин Несторовски беше бронзен во 2015 година“ , рече Каевски посакувајќи и успешен настап на нашите каратисти..
