Поранешниот шампион на УФЦ, Хабиб Нурмагомедов, откри дека пред една година му понудиле борба со Флојд Мејведер. Понудата до шампионот во ММА беше за спектакуларен боксерски меч, поткрепен со огромен финансиски надомест.
„Луѓето веројатно не ме разбираат. Се разбира, сите сакаат пари, но тоа не е се за мене. Добро ми е со моите пари. Ако Господ ми даде време да ги потрошам сите овие пари, ќе биде многу добро“, коментира Русинот.
Хабиб ја заврши својата импресивна кариера во октомври 2020 година, откако ја одбрани титулата на УФЦ во лесна категорија против Џастин Гејџи. Дагестанецот победи со задушување во второто коло.
„Да се прават пари е едно, но како да се трошат е друго. Ја завршив кариерата и сега сум пред задача да располагам со заработените пари“, призна Нурмагомедов.
Хабиб уште еднаш го негираше враќањето во кафезот.
„Имаме човек кој таму треба да го земе шампионскиот појас. Неговото име е Ислам Махачев. Мора да му ја врати титулата на Дагестан. Кон крајот на следната година повторно ќе имаме појас“, изјави Хабиб.
