Се чини дека Ентони Џошуа се раздели со тренерот Роберто Гарсија, откако промоторот Еди Херн потврди дека е во САД и составува нов тим.
По минатогодишниот прв пораз од Александар Усик, британскиот боксер се раздели со својот долгогодишен тренер Роб Мекракен, а го ангажираше Американецот Роберто Гарсија.
Во август Џошуа се обиде да му реваншира на Усик и да ги врати титулите во тешка категорија на ВБА (Супер), ИБФ, ВБО и ИБО, но не успеа.
По мечот се чинеше дека Џошуа и Гарсија се блиску до разделба, најмногу поради тоа што тренерот го критикуваше настапот на Еј Џеј.
Но подоцна Гарсија се оправдуваше дека сè е преведено погрешно, бидејќи тоа интервју беше на шпански.
Меѓутоа, промоторот на Џошуа, Еди Херн, сега открива дека Џошуа бара нов тренер во САД.
„Ентони се чувствува добро, моментално е во Америка и составува нов тим“, изјави Еди Херн и додаде:
„Тој избира со кого сака да соработува, а кога ќе го реши тоа, тогаш ќе му најдеме противник и ќе договориме датум за неговото враќање. Засега се оди според планот и со нетрпение го очекуваме наскоро враќањето на Еј Џеј во рингот“.
По разделбата со МекКрекен, Џошуа бил во контакт со тренерот на Канело, Еди Рејносо, и со тренерот на Буатси, Вирџил Хантер.
Но, се одлучи за Гарсија, бидејќи веруваше дека може да му ја даде победничката искра на реваншот против Усик.
Поранешниот шампион сега е во САД, а наводно бил снимен како тренира со Хантер.
