Еди Херн посочи тројца потенцијални противници за Дмитри Бивол

Промотерот Еди Херн ги откри најверојатните противници за следната борба на светскиот шампион во полутешка категорија Дмитри Бивол.

Русинот ја зацврсти својата позиција на врвот на дивизијата на 30 мај во Екатеринбург кога со едногласна одлука го победи Германецот Михаел Ајферт.

Веднаш по победата започнаа шпекулациите за тоа кој ќе биде следниот противник на Бивол. Според Херн, моменталниот задолжителен предизвикувач е Калум Смит.

„Во моментов има закажана борба против Калум Смит. Луѓето зборуваат за трета борба со Бетербиев или борба со Бенавидез, но Калум ја заслужува својата шанса. Ќе разговараме со Дмитри и неговиот тим“, изјави Херн за Боксинг њус онлајн.

Сепак, британскиот промотор не ја исклучува можноста дека Бивол би претпочитал поголема борба против Артур Бетербиев или Давид Бенавидез.

Третата борба меѓу Бивол и Бетербиев би била една од најочекуваните борби во професионалниот бокс, бидејќи двајцата веќе изградија едно од најголемите ривалства во полутешката категорија. Бенавидез, пак, долго време бара шанса против најдобрите борци во категоријата, а таков судир би предизвикал и огромен интерес.

Херн откри дека ако Бивол ги избере Бетербиев или Бенавидез, тогаш Калум Смит веројатно за испразнетата титула ќе се соочи со Џошуа Буаци.

„Тоа би била и огромна борба. Времињата се многу интересни во моментов, а Дмитри е подготвен да скокне директно во најголемите борби во спортот“, додаде Херн.

По победата над Ајферт, Бивол се најде повторно во центарот на вниманието на светот на боксот, а изборот на неговиот следен противник би можел да го одреди правецот на целата полутешка категорија во наредните месеци.