Уште по пристигнувањето во УФЦ во средината на 2020 година Хамзат Чимаев остави впечаток на борец кој ќе настапува многу редовно. Чимаев во рок од десет дена забележа две победи, а два месеци потоа го нокаутира и Џералд Мершарт.
Три настапи за два месеци се импресивен подвиг, но Хамзат по тоа забави. Кон крајот на 2020 година и почетокот на 2021 година Чимаев се бореше со коронавирусот. Во еден момент дури објави дека ја завршува кариерата поради компликации од инфекцијата, а откако на тренинг искашла крв, лекарите на УФЦ се посомневале дека Чимаев дури се бори со рак на белите дробови. За среќа, на Чимаев не му беше дијагностициран рак, но Хамзат долго време се бореше со последиците од коронавирусот.
Тој се врати во кафезот повеќе од една година по победата над Мершарт и лесно го совлада Ли Џинглијанг. Во текот на 2022 година Чимаев се појави двапати, а во изминатата календарска година имаше само еден меч. „Борз“ го победи Камару Усман на УФЦ 294 настанот по три многу интересни рунди.
Навивачите се надеваа дека Чимаев брзо ќе се врати во кафезот по таа победа и ќе го продолжи својот марш кон врвот во средна категорија, но Хамзат нема да го гледаме во кафезот некое време.
Имено, Чимаев преку социјалните мрежи сподели фотографии кои ја запрепастија ММА јавноста.
„Бев многу повреден, раката ми беше повредена, па не можев веднаш да се вратам. Сакам да се видам себеси во битка повеќе од сите вас. Ја сакам оваа работа, ќе работам и ќе докажам дека сум најдобар, како и секогаш. Наскоро, ако е по волја на Алах, ќе се вратам на тренинзите“, изјави Хамзат.
Од фотографиите е тешко да се препознае со какви точно проблеми се борел Чимаев, но одредено време поминал во болница, а лицето му било видно отечено, речиси непрепознатливо.
Покрај сето тоа, Хамзат се мачеше и со повреда на раката, а допрва треба да се врати на тренинзите. Ќе биде вистинска штета ако кариерата на Хамзат ја одбележат здравствени проблеми, бидејќи тој е борец од највисок калибар.
Многумина веднаш се сетија на Забит Магомедшарипов, па дури и на Аскар Аскаров. Станува збор за борци кои потекнуваат од слична клима, беа познати како извонредни таленти, но здравствените проблеми ги спречија да градат голема кариера. Чимаев во моментов оди по сличен пат, но се надеваме дека здравствените проблеми се зад него.
